A de Cedeira é unha das dúas rías que hai neste territorio. A pesar do seu pequeno tamaño ten dúas entradas separadas pola punta Robaleira, ao Norte a que lle dá abrigo ao porto de Cedeira e de claro dominio mariño, mentres que ao Sur se atopa a enseada de Vilarrube, que en baixamar ten un evidente dominio fluvial. Neste último sector destaca o fermoso esteiro do río das Mestas, que posúe diferentes canais intermareais e barras areosas. Unha desas barras orixinou a actual praia de Vilarrube que conta na súa parte máis alta cun paleocantil.
Pola súa banda, a contorna da vila de Cedeira conta con bos exemplos de pregues, tanto no seu porto coma na praia de Sonreiras. Durante a baixamar é moi chamativo o prodelta do río Condomiñas. Nas inmediacións do faro de Robaleira atópase a cala Miseñora onde é posible ollar un pequeno arco mariño, un elemento xeomorfolóxico relativamente abundante nesta ría dado que aos pés do Monte Burneira é posible ollar outros dous arcos.
Na zona do porto cedeirés chaman a atención as formas das anfibolitas, o material predominante desde alí até Punta Balteira -preto de Santo André de Teixido-, aínda que na zona máis próxima á costa hai unha faixa de entre 100 e 200 metros de ancho na que se alternan os gneises coas peridotitas e serpentinitas. A banda vai desde a Punta do Carreiro até a Punta Candieira e conta con alomentos catro fallas que rachan a continuidade liñal deses materiais.
Concello: Cedeira
Visitable: Si, percorrendo en coche ou a pé a zona costeira
Outros datos: As zonas de interese xeolóxico situadas máis ao sur atópanse nos areais de Vilarrube e da desembocadura do río das Mestas. As que se encontran na proximidade da vila -porto, punta Sarridal e ata a capela de San Antón- poden percorrerse por unha senda peonil. Se tedes ganas de continuar a pé é tamén moi recomendable achegarse até Punta Candieira.
