val_do_xubia

Val do río Xubia

O río Xubia, que deu orixe á ría de Ferrol, presenta un val fluvial bastante aberto no seu treito final. Isto débese en grande medida á presenza unha salientable estrutura xeolóxica, a falla de As Pontes Pedroso, que facilitou a erosión de todas aquelas rochas por onde pasa. Esta hipótese vese xustificada cando o río Xubia atravesa materiais que non están afectados pola falla de As Pontes-Pedroso, e en consecuencia ten que encaixonarse fortemente como calquera outro río desta parte de Galicia. 

Un dos mellores miradoiros para ver este val é o Pico de Ferreira, que a súa vez é o que en xeoloxía se denomina inselberg ou “monte illa”, é dicir, unha montaña que pola natureza dos seus materiais resistiu mellor a erosión que as rochas que había na súa contorna. Outro exemplo de relevo destacado na paisaxe e a Pena do Rei Mouro, formada por un filón de seixo, mineral moi duro, e ao seu redor lousas que son moito máis brandas. 

Desde o Pico de Ferreira tamén se pode divisar ao norleste o val sedimentario de Moeche -presidido polo castelo- que, malia parecer unha veiga fluvial, non ten ningún río que modelase a paisaxe desa maneira.

Concello: San Sadurniño
Visitable: Si, en coche ou a pé
Outros datos: A zona está na banda sur do proxecto de xeoparque e relativamente preto dos puntos de interese do Forgoselo, das canteiras de toelo e das minas de cobre. O Pico de Ferreira é un miradoiro natural cun alto valor patrimonial xa que nel existe unha tumba antropomorfa cavada na rocha – a “cama do santo”- que deu orixe a múltiples lendas. Desde alí divísase boa parte do territorio de Moeche, San Sadurniño e mesmo parte de Valdoviño e da ría de Ferrol, ademais de ter unha espectacular perspectiva da falla de Pedroso.

Comparte este contido

Share on facebook
Facebook
Share on twitter
Twitter
Share on email
Email

Máis que ver

.

Unha viaxe a o interior da Terra

© Mancomunidade de Concellos da Comarca de Ferrol